2023/08/08 / Last updated : 2023/08/08 東京支店 News（Tagalog）

140 BATA NA WALANG RESIDENT STATUS SA JAPAN, BIBIGYAN NG PERMISO NA MANATILI SA BANSA

Nasa 140 na anak ng mga dayuhan sa Japan na walang resident status kahit na ipinanganak at lumaki rito ang bibigyan ng special permission para manatili sa bansa, ito ang inanunsyo ni Justice Minister Ken Saito kamakailan.

Saad sa ulat ng The Yomiuri Shimbun, nagdesisyon ang gobyerno na ipatupad ang hakbang na ito base sa humanitarian grounds.

Ipagkakaloob ng justice minister ang special permission for residency kung ang lahat ng mga requirements ay maipapasa ng aplikante.

Isasaalang-alang ng Justice Ministry kung ang mga bata ay ipinanganak sa Japan, nag-aral sa elementarya o junior high school, at ang kanilang pagnanais na manirahan sa bansa para mabigyan ng special permit.