2022/10/14 / Last updated : 2022/10/14 東京支店 News（Tagalog）

BABAE, GINAHASA MATAPOS PAINUMIN NG TSAA NA MAY PAMPATULOG NG KASINTAHAN

Inakusahan ng panggagahasa ang isang 29-taong gulang na empleyado ng Shibuya Ward office ng kanyang kasintahang babae na nakilala niya sa isang dating app nitong Abril.

Sa ulat ng Kyodo News, inaresto ng mga pulis ang lalake matapos na lagyan umano nito ng pampatulog ang pinainom na tsaa sa kasintahang babae. Sa salaysay ng biktima, inaya siya ng suspek na manood ng pelikula sa apartment nito noong Mayo 1. Nang nasa apartment na ay inaya rin umano siya na makipagtalik ngunit kanya itong tinanggihan. Pagkaraan ay binigyan siya ng tsaa at nawalan ng malay.

Umamin ang lalake sa paratang laban sa kanya. Iniimbestigahan na ng mga pulis kung may mga iba pang ganitong kaso na kinasangkutan ang suspek.